യാത്രക്കാര്‍ ആവശ്യപ്പെടുന്ന സ്ഥലത്ത് രാത്രിയില്‍ ദീര്‍ഘദൂര ബസുകള്‍ നിര്‍ത്താനാവില്ലെന്ന് കെ.എസ്.ആര്‍.ടി.സി. ദീര്‍ഘദൂര ബസിലെ യാത്രക്കാര്‍ക്ക് ഇതുസംബന്ധിച്ച് പരാതിയുണ്ടെന്നും കെ.എസ്.ആര്‍.ടി.സി. വനിതാകമ്മിഷനെ അറിയിച്ചു. പാലക്കാട് വാളയാര്‍ റൂട്ടില്‍ പതിനാലാംകല്ലില്‍ ബസുകള്‍ നിര്‍ത്താറില്ലെന്ന് പാലക്കാട് സ്വദേശി മണികണ്ഠനാണ് പരാതിനല്‍കിയത്. ഇതില്‍ കമ്മിഷന്‍ ആക്ടിങ് ചെയര്‍പേഴ്‌സണും ജുഡീഷ്യല്‍ അംഗവുമായ കെ. ബൈജുനാഥ് റിപ്പോര്‍ട്ട് ആവശ്യപ്പെട്ടിരുന്നു.
കെ.എസ്.ആര്‍.ടി.സി. മാനേജിങ് ഡയറക്ടറുടെ വിശദീകരണം പിന്നാലെയാണ് എത്തിയത്. രാത്രി എട്ടുമുതല്‍ രാവിലെ ആറുവരെ സ്ത്രീകളും മുതിര്‍ന്ന പൗരന്‍മാരും ഭിന്നശേഷിക്കാരും ആവശ്യപ്പെടുന്ന സ്ഥലങ്ങളില്‍ ബസ് നിര്‍ത്തണമെന്നാണ് സര്‍ക്കുലറില്‍ നിര്‍ദേശിക്കുന്നത്. ദീര്‍ഘദൂര മള്‍ട്ടി ആക്‌സില്‍ എ.സി. സൂപ്പര്‍ഡീലക്‌സ്, സൂപ്പര്‍ എക്‌സ്പ്രസ് ബസുകളില്‍ ഈ നിര്‍ദേശം നടപ്പാക്കുന്നത് പ്രായോഗികമല്ല.
ഇത് ദീര്‍ഘദൂരയാത്രക്കാര്‍ക്ക് അസൗകര്യമാണെന്നും ഒട്ടേറെ പരാതികള്‍ ഉയര്‍ന്നിട്ടുണ്ടെന്നും മാനേജിങ് ഡയറക്ടര്‍ കമ്മിഷനെ അറിയിച്ചു. പാലക്കാട് വാളയാര്‍ റൂട്ടില്‍ രാത്രിയില്‍ ബസ് സര്‍വീസുകള്‍ കുറവായ സാഹചര്യത്തില്‍ ഓര്‍ഡിനറി ബസ് സര്‍വീസുകള്‍ ഏര്‍പ്പെടുത്താനുള്ള സാധ്യത പരിശോധിക്കണമെന്ന് കെ.എസ്.ആര്‍.ടി.സി. ജില്ലാ ട്രാന്‍സ്‌പോര്‍ട്ട് ഓഫീസര്‍ക്ക് കമ്മിഷന്‍ നിര്‍ദേശം നല്‍കി.