ഗ്ലാമറും ഹൊററും ഒത്തു ചേർന്ന വിനോദ ചിത്രമായി ‘ നീയാ 2 ‘ വരുന്നു !

കമലഹാസൻ ,മുത്തുരാമൻ ,ശ്രീപ്രിയാ ,ലത എന്നിവർ അഭിനയിച്ച ‘നീയാ’ 1979 ൽ പുറത്തിറങ്ങി അത്ഭുതവിജയം നേടിയ  ഹൊറർ സിനിമയായിരുന്നു. ഇന്നും ആ ചിത്രത്തിലെ ഗാനങ്ങൾ അനശ്വരങ്ങളാണ് . നടി ശ്രീപ്രിയയായിരുന്നു  ‘നീയാ’നിർമ്മിച്ചത് . നാല് പതിറ്റാണ്ടിനു ശേഷം ആ പേര് കടം കൊണ്ട് ‘നീയാ 2′ എന്ന പേരിൽ ഒരു ഹൊറർ സിനിമ അണിഞ്ഞൊരുങ്ങുന്നു .

ജയ് നായകനാവുന്ന ഈ ചിത്രത്തിൽ റായ് ലക്ഷ്മി ,കാതറിൻ തെരേസാ ,വരലക്ഷ്മി ശരത് കുമാർ എന്നീ  മൂന്ന് നായികമാരാണുള്ളത് .ഗ്ലാമറസായിട്ടുള്ള  പ്രകടനമത്രെ ചിത്രത്തിൽ ഈ താരങ്ങളുടേത് .പഴയ ‘നീയാ’യും ‘നീയാ 2’ ഉം തമ്മിൽ യാതൊരു ബന്ധവും ഇല്ലെന്നും കഥക്ക് അനിവാര്യമായതു  കൊണ്ട് ശ്രീപ്രിയയിൽ നിന്നും ടൈറ്റിൽ വാങ്ങി ‘നീയാ 2′   എന്ന് പേരിടുകയായിരുന്നുവെന്നും ചിത്രത്തിന്റെയ് അണിയറ ശിൽപികൾ .

‘നീയാ 2′  ൽ ഇരുപത്തിരണ്ടടി നീളമുള്ള   ഒരു രാജവെമ്പാല പ്രധാന   കഥാപാത്രമായി വരുന്നുണ്ടത്രേ .ഇതിന്റെ  രൂപം തീരുമാനിക്കുവാൻ  സംവിധായകൻ എൽ .സുരേഷും ക്യാമെറാമെൻ രാജവേൽ  മോഹനും ലോകമെമ്പാടുമുള്ള വനാന്തരങ്ങളിൽ അന്വേഷണം നടത്തി ഒടുവിൽ ബാങ്കോക്കിൽ  നിന്നുമാണത്രെ കണ്ടെത്തിയത് .അതിന്റെ സ്വഭാവം , ഘടന ,ബോഡി ലാംഗ്വേജ് എന്നിവ  കേട്ടറിഞ്ഞു മനസ്സിലാക്കി ആ രാജവെമ്പാലയെയാണ് കഥാപാത്രമാക്കിയിരിക്കുന്നത് .ഇതിൽ വരലക്ഷ്‌മി ശരത്കുമാർ സർപ്പ കന്യകയായി അഭിനയിക്കുന്നു എന്നതാണ് മറ്റൊരു പ്രത്യേകത .

ശക്തമായ പ്രണയകഥയുടെ പശ്ചാത്തലത്തിലുള്ള നർമ്മരസപ്രദമായ ഹൊറർ ചിത്രമായ  ‘നീയാ 2′   ന്റെ ചിത്രീകരണം ചാലക്കുടി ,കൊടൈക്കനാൽ ,ഊട്ടി,തലക്കോണം എന്നിവിടങ്ങളിലായി പൂർത്തിയായി .ജംബോ സിനിമാസിനു വേണ്ടി ഏ .ശ്രീധർ  ദശകോടികളുടെ  മുതൽമുടക്കിൽ ഗ്രാഫിക്‌സ്  സ്പെഷ്യൽ ഇഫക്‌ട് എന്നീ  സാങ്കേതികയുടെ അകമ്പടിയോടെയാണ്  നിർമ്മിക്കുന്നത് . പ്രായ ഭേദമന്യേ കുട്ടികൾക്കും  മുതിർന്നവർക്കും ഒരു പോലെ ഇഷ്ടപെടുന്ന സിനിമയായിരിക്കുമിതെന്ന് സംവിധായകൻ.എൽസുരേഷ്  അവകാശപ്പെട്ടു ‘നീയാ 2′ ഉടൻ തന്നെ  പ്രദർശനത്തിനെത്തും.