ഇരുപത്തിയൊന്നാം നൂറ്റാണ്ടുമായി പ്രണവ്

മലയാളികളുടെ പ്രിയ താരം മോഹൻലാലിൻറെ മകൻ പ്രണവ് മോഹൻലാൽ ഇരുപത്തിയൊന്നാം നൂറ്റാണ്ട് എന്ന ചിത്രത്തിലൂടെ വീണ്ടും എത്തുന്നു. മുളകുപാടം ഫിലിംസിന്റെ ബാനറില്‍ അരുണ്‍ ഗോപിയാണ് ഇരുപത്തിയൊന്നാം നൂറ്റാണ്ട് സംവിധാനം ചെയ്യുന്നതും തിരക്കഥ ഒരുക്കുന്നതും.

മുപ്പത്തിയൊന്ന് വർഷങ്ങൾക്ക് മുൻപ് മോഹൻലാൽ അഭിനയിച്ച എസ്.എന്‍ സ്വാമിയുടെ തിരക്കഥയില്‍ കെ.മധു സംവിധാനം ചെയ്ത ഇരുപതാം നൂറ്റാണ്ട് എന്ന ചിത്രം ഇന്നും പ്രേക്ഷകർ മറന്നിട്ടില്ല. മോഹൻലാൽ സാഗർ ഏലിയാസ് ജാക്കി ആയി എത്തി അധോലോക കഥ പറഞ്ഞ ചിത്രമാണ് ഇരുപതാം നൂറ്റാണ്ട്.

എന്നാൽ ഇരുപത്തൊന്നാം നൂറ്റാണ്ട് അധോലോക കഥയായിരിക്കില്ല എന്നാണ് സൂചന. പീറ്റര്‍ ഹെയിന്‍ ആണ് ചിത്രത്തിന്റെ ആക്ഷന്‍ കൈകാര്യം ചെയ്യുന്നത്. സംഗീതം ഗോപിസുന്ദര്‍, ഛായാഗ്രഹണം അഭിനന്ദ് രാമാനുജന്‍.

മോഹൻലാൽ ആണ് തന്റെ പേജിലൂടെ ചിത്രത്തിന്റെ ടൈറ്റിൽ പങ്കുവച്ചത്. ആദിയിലെ അഭിനയത്തിലൂടെ ധാരാളം പ്രശംസകൾ നേടിയിരുന്നു പ്രണവ്.