മുന്നാറിൽ റവന്യൂ വകുപ്പിന്റെ നടപടി നേരിടുന്ന ഭൂമി പാട്ടത്തിന് നൽകി കബളിപ്പിച്ചെന്ന കേസിലാണ് നടൻ ബാബുരാജിന്റെ അറസ്റ്റ്. ഹൈക്കോടതി നിർദേശപ്രകാരം അടിമാലി പോലീസ് സ്റ്റേഷനിൽ ബാബുരാജ് ഹാജരാവുകയായിരുന്നു. മൂന്നാർ കമ്പിലൈനിൽ ബാബുരാജിന്റെ ഉടമസ്ഥതയിലുള്ള വൈറ്റ് മിസ്റ്റ് റിസോർട്ടുകളുമായി ബന്ധംപ്പെട്ടു കോതമംഗലം തലക്കോട് സ്വദേശിയായ വ്യവസായി അരുൺ കുമാറാണ് പരാതി നൽകിയത്. 2020 ജനുവരിയിൽ ഈ റിസോർട്ട് അരുണിന് ബാബുരാജ് പാട്ടത്തിന് നൽകിയിരുന്നു.
മൂന്നാർ ആനവിരട്ടി കമ്പിലൈൻ ഭാഗത്ത്‌ 22 കെട്ടിടങ്ങൾ ഉൾപെടുത്തുന്നതാണ് വൈറ്റ് മിസ്റ്റ് മൗണ്ടൻ ക്ലബ്‌. ഇതിൽ അഞ്ചു കെട്ടിടങ്ങൾക്ക് മാത്രമേ പള്ളിവാസൽ പഞ്ചായത്ത്‌ നമ്പറിട്ടിട്ടു ള്ളുവെന്നും പരാതിയിലുണ്ട്. 40 ലക്ഷം രൂപ കരുതൽധനമായി മാറി. സ്ഥാപന ലൈസൻസിനായി അരുൺ കുമാർ പള്ളിവാസൽ പഞ്ചായത്തിൽ അപേക്ഷിച്ചു. എന്നാൽ ഈ സ്ഥലത്തിന്റെ പട്ടയം സാധുവല്ലാത്തതിനാൽ ലൈസൻസ് നൽകാൻ കഴിയില്ലെന്ന് പഞ്ചായത്ത്‌ മറുപടി നൽകി. ബാബുരാജിന് നൽകിയ 40 ലക്ഷം രൂപ തിരികെ ലഭിക്കുമെന്നാണ് അരുണിന്റെ ആവശ്യം. പല അവധികൾ പറഞ്ഞെങ്കിലും തുക നൽകിയില്ലെന്നും പരാതിയിൽ പറയുന്നു. കഴിഞ്ഞ മാർച്ചിൽ അടിമാലി കോടതിയിലും അരുൺ കുമാർ കേസ് കൊടുത്തിരുന്നു. അടിമാലി പോലീസിനോട് വഞ്ചനകുറ്റത്തിന് കേസ് എടുക്കാൻ കോടതി നിർദ്ദേശിക്കുകയായിരുന്നു.